அபிராமி பட்டர் அருளிய அபிராமி அந்தாதி என்பது அன்னை அபிராமியைப் போற்றி அபிராமி பட்டர் பாடிய 100 பாடல்களைக் கொண்ட பக்தி இலக்கியமாகும்.
நாற்பத்தைந்தாம் பாடல்
தொண்டு செய்யாது நின் பாதம் தொழாது, துணிந்து இச்சையே
பண்டு செய்தார் உளரோ? இலரோ? அப்பரிசு அடியேன்
கண்டு செய்தால் அது கைதவமோ? அன்றிச் செய்தவமோ?
மிண்டு செய்தாலும் பொறுக்கை நன்றே; பின் வெறுக்கை அன்றே.
பொருள்
தேவியே! உனக்குத் தொண்டு செய்யாமலும், உன் திருவடிகளை வணங்காமலும், உண்மையான மெய்ப்பொருளை உணர்ந்து, தங்கள் மனம் விரும்பியபடி வாழ்ந்த ஞானிகளும், உன் அடியார்களும் முற்காலத்தில் இருந்துள்ளனர். அவர்கள் அவ்வாறு செயல்பட்டது தவறாகக் கருதப்படவில்லை என்றால், அவர்களைப் பின்பற்றி நானும் என் விருப்பப்படி செயல்படுவது மட்டும் எப்படி வஞ்சகமாகும்? அவர்கள் செய்த செயல்கள் தவமாகக் கருதப்பட்டதைப் போல, நான் செய்வதும் தவமாகவே கருதப்பட வேண்டாமா?
இவ்வாறு நான் செய்யும் செயல்களில் ஏதேனும் தவறு இருந்தால், அன்னையே, அதை நீ பொறுத்தருள்வதே சிறந்தது. என்னை வெறுத்து ஒதுக்காமல், கருணையுடன் ஏற்றுக்கொண்டு அருள வேண்டும்.