அபிராமி பட்டர் அருளிய அபிராமி அந்தாதி என்பது அன்னை அபிராமியைப் போற்றி அபிராமி பட்டர் பாடிய 100 பாடல்களைக் கொண்ட பக்தி இலக்கியமாகும்.
தொண்ணூற்று நான்காம் பாடல்
விரும்பித் தொழும் அடியார், விழிநீர்மல்கி மெய்புளகம்
அரும்பி, ததும்பிய ஆனந்தமாகி; அறிவிழந்து,
சுரும்பிற் களித்து மொழி தடுமாறி, முன் சொன்னஎல்லாம்
தரும்பித்தர் ஆவரென்றால், அபிராமி சமயம் நன்றே.
பொருள்
அபிராமி அன்னையை ஆழ்ந்த பக்தியுடன் விரும்பி வழிபடும் அடியவர்களின் கண்களில் ஆனந்தக் கண்ணீர் பெருகுகிறது. அவர்களுடைய உடல் முழுவதும் புளகாங்கிதம் ஏற்பட்டு, உள்ளத்தில் அளவற்ற மகிழ்ச்சி பொங்குகிறது. இறைவியின் பேரானந்தத்தில் மனம் மயங்கி, தேனை உண்ட வண்டு போல் தன்னை மறந்து, பேசும் வார்த்தைகள்கூட தடுமாறும் அளவுக்கு பரவச நிலையை அடைகிறார்கள். இவ்வாறு இறைஅன்பில் திளைத்து தங்களை மறக்கச் செய்யும் அபிராமி அன்னையின் வழிபாடே எல்லாவற்றிலும் சிறந்ததும் நன்மை தருவதுமான வழியாகும் அல்லவா?