அபிராமி பட்டர் அருளிய அபிராமி அந்தாதி என்பது அன்னை அபிராமியைப் போற்றி அபிராமி பட்டர் பாடிய 100 பாடல்களைக் கொண்ட பக்தி இலக்கியமாகும்.
அறுபத்தொன்பதாம் பாடல்
தனந்தரும்; கல்வி தரும்; ஒருநாளும் தளர்வறியா
மனந்தரும்; தெய்வ வடிவுந்தரும்; நெஞ்சில் வஞ்சமில்லா
இனந்தரும்; நல்லன எல்லாம் தரும்; அன்பர் என்பவர்க்கே
கனந்தரும் பூங்குழலாள் அபிராமி கடைக்கண்களே.
பொருள்
நறுமணம் வீசும் மலர்களைச் சூடிய மேகம் போன்ற கருமையான கூந்தலை உடைய அபிராமி அன்னையின் கடைக்கண் பார்வை, அவளை பக்தியுடன் வழிபடும் அடியவர்களுக்கு எண்ணற்ற நன்மைகளை அருளும். செல்வச் செழிப்பையும், சிறந்த கல்வியையும், எந்த நிலையிலும் தளராத மன உறுதியையும் வழங்கும். தெய்வீகமான அழகையும், உள்ளத்தில் வஞ்சமில்லாத நல்ல உறவினர்களின் அன்பையும் நட்பையும் கொடுக்கும். இவற்றுடன், வாழ்க்கையில் நன்மை தரக்கூடிய வேறு எத்தனை சிறப்புகள் உள்ளனவோ, அவை அனைத்தையும் அன்னையின் அருட்பார்வை வாரி வழங்கும்.