ஆடிப்பூரம் 2026 : திருமண யோகம், குழந்தை பாக்கியம் அருளும் அம்பிகையின் அருள் நாள்… எப்படி வழிபட வேண்டும்?
ஆடிப்பூரம் ஆன்மீக ரீதியாக மிகவும் சக்தி வாய்ந்த, வேண்டிய வரங்களை அருளும் மங்களகரமான நாளாக போற்றப்படுகிறது. திருமணம் கைகூட வேண்டும், நல்ல வரன் அமைய வேண்டும், குழந்தை பாக்கியம் கிடைக்க வேண்டும் என்று மனமார வேண்டுபவர்கள், இந்த நாளில் வீட்டிலேயே எளிய முறையில் அம்பிகையை வழிபடலாம். முழு நம்பிக்கையுடனும் பக்தியுடனும் இந்த வழிபாட்டை மேற்கொண்டால், அன்னை பராசக்தியின் அருளால் வேண்டுதல்கள் நிறைவேறும் என்பது பக்தர்களின் உறுதியான நம்பிக்கையாகும். ஆடிப்பூரத்தின் சிறப்பும், இந்த நாளில் செய்ய வேண்டிய வழிபாட்டு முறைகளும் பற்றி விரிவாக தெரிந்து கொள்ளலாம்.
ஆடிப்பூரத்தின் மகிமை
ஆடி மாதத்தில் வரும் பூரம் நட்சத்திர தினமே ஆடிப்பூரம் எனக் கொண்டாடப்படுகிறது. ஆடி மாதத்தின் மிகச் சிறப்பான விரத நாட்களில் ஒன்றாகக் கருதப்படும் இந்த நாளில், சைவ மற்றும் வைணவ ஆலயங்களில் சிறப்பு பூஜைகள், அலங்காரங்கள், உற்சவங்கள் விமர்சையாக நடைபெறும்.
பொதுவாக பக்தர்களே கோயிலுக்குச் சென்று அம்பிகையிடம் தங்கள் துயரங்களையும் வேண்டுதல்களையும் சமர்ப்பிப்பார்கள். ஆனால் ஆடிப்பூரம் நாளில், பக்தர்களுக்கு அருள் புரிவதற்காக அன்னையே பூமிக்கு வந்து அருள்பாலிப்பதாக ஆன்மீக நம்பிக்கை உள்ளது. அனைத்து அம்பிகை வடிவங்களிலும் அன்னை பராசக்தியின் தெய்வீக சக்தி முழுமையாக வெளிப்படும் நாளாகவும் ஆடிப்பூரம் போற்றப்படுகிறது.
நினைத்தது நிறைவேற்றும் ஆடிப்பூரம்
ஆடி மாதத்தில் பிறக்கும் குழந்தைகள் குறித்து சில பழமையான நம்பிக்கைகள் கிராமப்புறங்களில் இருந்தாலும், அதே ஆடி மாத பூரம் நட்சத்திரத்தில்தான் பூமாதேவியின் அம்சமாகவும், மகாலட்சுமியின் அவதாரமாகவும் போற்றப்படும் ஆண்டாள் நாச்சியார் அவதரித்தார் என்று புராணங்கள் கூறுகின்றன.
தான் சூடிய மலர்மாலையையே அரங்கநாதப் பெருமாளுக்கு சமர்ப்பித்த ஆண்டாளின் பக்தியையும் காதலையும் ஏற்றுக்கொண்ட அரங்கன், அந்த மாலையை மட்டுமல்ல, ஆண்டாளையும் தன் துணைவியாக ஏற்றுக்கொண்டார். இந்த நிகழ்வு, ஆண்டாளின் பக்தியின் மகத்துவத்தை எடுத்துரைக்கிறது.
எனவே ஆண்டாளின் அருளையும், அதன் மூலம் அரங்கநாதப் பெருமாளின் அருளையும், அன்னை பராசக்தியின் அருளையும் பெற மிகவும் உகந்த நாளாக ஆடிப்பூரம் கருதப்படுகிறது. ஆண்டாள் விரும்பியபடி அரங்கனை மணந்தது போல, இந்த நாளில் பக்தியுடன் வழிபடுபவர்களின் மனவிருப்பங்களும் நிறைவேறும் என்பது நம்பிக்கை.
திருமண வரனும், குழந்தை பாக்கியமும் கிடைக்க செய்ய வேண்டிய வழிபாடு
- திருமண வரன் வேண்டுபவர்கள் வீட்டில் உள்ள அம்மன் படத்தை கிழக்கு நோக்கி மனைப்பலகையில் வைத்து அலங்கரிக்க வேண்டும்.
- அம்மனுக்கு மஞ்சள், சந்தனம், குங்குமம் வைத்து நலங்கு செய்ய வேண்டும்.
- அதே மனைப்பலகையில் வெள்ளை நிறத் துணி விரித்து, அம்மனின் மடியில் அமர்ந்திருப்பதாக மனதில் நினைத்து, திருமண வரன் வேண்டுபவர் (ஆண் அல்லது பெண்) அமர வேண்டும்.
- வீட்டில் உள்ள பெரியவர்கள் அம்மனுக்கு நலங்கு வைத்தது போலவே அந்த நபருக்கும் நலங்கு செய்ய வேண்டும்.
- குழந்தை பாக்கியம் வேண்டுபவர்கள் பெண்களை மட்டும் இதே முறையில் அமர வைத்து, வீட்டின் பெரியவர்கள் அல்லது கணவர் நலங்கு செய்யலாம்.
- அம்மனுக்கு அணிவித்த வளையல்களை பெண்கள் அணிவது சிறப்பானதாக கருதப்படுகிறது.
- நைவேத்தியமாக இனிப்பு பால் சமர்ப்பிக்கலாம்.
- குழந்தை பாக்கியம் வேண்டுபவர்கள் கலவை சாதமும், திருமண வரன் வேண்டுபவர்கள் கல்யாண விருந்து போன்ற உணவுகளையும் தலைவாழை இலையில் படையலாக வைத்து வழிபடலாம்.
- பூஜை முடிந்த பிறகு நைவேத்தியப் பிரசாதத்தை குடும்பத்தினர் அனைவரும் பகிர்ந்து சாப்பிட வேண்டும்.
- பின்னர் அருகிலுள்ள அம்மன் கோயிலுக்குச் சென்று வளைகாப்பிற்காக வளையல்கள் வாங்கி சமர்ப்பிக்கலாம். அதேபோல், கோயிலுக்கு வரும் பெண்களுக்கு வளையல் மற்றும் மஞ்சள் கயிறு தானமாக வழங்குவது மிகவும் புண்ணியமானதாகக் கருதப்படுகிறது.
ஆடிப்பூரம் நாளில் மனமார அம்பிகையை வேண்டி இந்த வழிபாட்டை மேற்கொள்வதால், திருமணத் தடைகள் விலகி நல்ல வரன் அமையவும், குழந்தை பாக்கியம் கிட்டவும், குடும்பத்தில் மகிழ்ச்சியும் மங்களமும் பெருகும் என்று பக்தர்கள் நம்புகின்றனர்.