2026 ஆகஸ்ட் சோமவார பிரதோஷம்: விரதம் இருந்து சிவனை வழிபட்டால் கிடைக்கும் பலன்கள் என்ன?
பிரதோஷ வழிபாட்டின் சிறப்பும் பலன்களும் அது வரும் கிழமையைப் பொறுத்து மாறுபடும். குறிப்பாக திங்கட்கிழமையில் வரும் சோமவார பிரதோஷமும், சனிக்கிழமையில் வரும் சனி மகா பிரதோஷமும் மிகவும் சிறப்பு வாய்ந்ததாகக் கருதப்படுகின்றன. சிவபெருமானுக்கு உகந்த திங்கட்கிழமையில் பிரதோஷம் இணைந்து வருவதால், சோமவார பிரதோஷத்தில் சிவ வழிபாடு செய்வது சிறப்பான பலன்களைத் தரும் என்பது நம்பிக்கை.
இந்து சமய நம்பிக்கைகளின்படி, சிவபெருமானை வழிபடுவதற்குரிய முக்கியமான விரதங்களில் பிரதோஷ விரதமும் ஒன்றாகும். சிவபெருமானுக்குரிய எட்டு வகையான விரதங்களில் பிரதோஷ விரதம் முதன்மையானதாகக் கருதப்படுகிறது. ஒவ்வொரு மாதமும் வளர்பிறை மற்றும் தேய்பிறை திரயோதசி திதியில் மாலை நேரத்தில் பிரதோஷ வழிபாடு நடைபெறும். இந்த திரயோதசி திதி திங்கட்கிழமையுடன் இணைந்து வரும்போது அது சோமவார பிரதோஷம் என்று அழைக்கப்படுகிறது.
சோமவார பிரதோஷத்தின் சிறப்புகள்
சிவபெருமானுக்கு உகந்த நாள்: திங்கட்கிழமை சிவபெருமானுக்கும் சந்திரனுக்கும் உரிய நாளாகக் கருதப்படுகிறது. அந்த நாளில் பிரதோஷமும் சேர்ந்து வருவதால் சிவ வழிபாட்டின் சிறப்பு மேலும் அதிகரிக்கும்.
பாவங்கள் நீங்கும்: தெரிந்தும் தெரியாமலும் செய்த பாவங்கள், மனக்கவலைகள் மற்றும் வாழ்க்கையில் ஏற்படும் தடைகள் நீங்கும் என்பது ஆன்மிக நம்பிக்கை.
சந்திர தோஷ நிவர்த்தி: ஜாதகத்தில் சந்திரனால் ஏற்படும் பாதிப்புகள் இருப்பதாக நம்புபவர்கள், சோமவார பிரதோஷத்தில் சிவபெருமானை வழிபடுவதன் மூலம் மன அமைதியும் தெளிவும் பெறலாம்.
பிரதோஷ நேரமும் நந்தி வழிபாடும்
பொதுவாக மாலை நேரமே பிரதோஷ காலமாகக் கருதப்படுகிறது. இந்த நேரத்தில் சிவபெருமான் நந்தி தேவரின் கொம்புகளுக்கு இடையே ஆனந்த தாண்டவம் ஆடுவதாக ஐதீகம்.
பிரதோஷ நாளில் நந்தி தேவருக்கு அருகம்புல், மலர் மாலை, வில்வ இலைகள் உள்ளிட்டவற்றைச் சாற்றி வழிபடுவது சிறப்பு. நந்தியின் இரு கொம்புகளுக்கு இடையே சிவபெருமான் மற்றும் பார்வதி தேவியை தரிசிப்பது சிறப்பான பலன்களைத் தரும் என்றும் நம்பப்படுகிறது.
2026 ஆகஸ்ட் சோமவார பிரதோஷத்தின் சிறப்பு
2026 ஆகஸ்ட் 10-ம் தேதி தேய்பிறை பிரதோஷம் வருகிறது. இது திங்கட்கிழமையில் அமைவதால் சோமவார பிரதோஷம் என்ற சிறப்பைப் பெறுகிறது. மேலும், அன்றைய தினம் பகல் நேரம் வரை சிவபெருமானுக்குரிய திருவாதிரை நட்சத்திரமும், அதன் பின்னர் ஸ்ரீராமருக்குரிய புனர்பூசம் நட்சத்திரமும் இடம்பெறுவது குறிப்பிடத்தக்கதாகக் கருதப்படுகிறது.
புனர்பூசம் நட்சத்திரத்தின் அதிபதியாக குரு பகவான் கருதப்படுவதால், திருமணம் உள்ளிட்ட மங்கள காரியங்கள் தடையின்றி நடைபெற வேண்டும், கல்வி மற்றும் தொழிலில் முன்னேற்றம் பெற வேண்டும் என்று விரும்புபவர்கள் இந்த நாளில் விரதம் இருந்து வழிபடலாம் என்பது நம்பிக்கை.
சோமவார பிரதோஷ வழிபாட்டு முறைகள்
- காலையில் தொடங்கி இயன்றவரை விரதம் இருந்து, மாலை பிரதோஷ நேரத்தில் சிவன் கோயிலுக்குச் சென்று வழிபடலாம்.
- கோயில் அபிஷேகத்திற்காக பால், தயிர், இளநீர், சந்தனம், தேன், வில்வ இலைகள் போன்றவற்றை காணிக்கையாக வழங்கலாம்.
- பிரதோஷ நேரத்தில் கோயிலைச் சுற்றி சோமசூக்த பிரதோஷ வலம் வருவது சிறப்பாகக் கருதப்படுகிறது.
- முழுமையாக உபவாசம் இருக்க முடியாதவர்கள், தங்கள் உடல்நிலைக்கு ஏற்றவாறு உணவு எடுத்துக்கொண்டு, சிவ வழிபாட்டில் மனதை செலுத்தலாம்.
- பிரதோஷ நேரத்தில் “ஓம் நமசிவாய” என்ற பஞ்சாட்சர மந்திரத்தை ஜபித்து சிவபெருமானை வழிபடலாம்.
சோமவார பிரதோஷ வழிபாட்டின் பலன்கள்
சோமவார பிரதோஷத்தில் சிவபெருமானை வழிபடுவதால் குடும்பத்தில் ஒற்றுமையும் மகிழ்ச்சியும் பெருகும் என்பது நம்பிக்கை. கடன் தொல்லைகள், பொருளாதார சிரமங்கள், தொழில் மற்றும் கல்வியில் ஏற்படும் தடைகள் நீங்கி முன்னேற்றம் கிடைக்க வேண்டும் என்று இறைவனை வேண்டலாம்.
மேலும் மனக்குழப்பம் மற்றும் கவலைகள் குறைந்து மன அமைதி கிடைக்கவும், சிவபெருமானின் அருள் கிடைக்கவும் இந்த நாளில் பக்தியுடன் வழிபடுவது சிறப்பு. உலக வாழ்க்கையில் நன்மைகளையும், இறைவனின் அருளையும் பெறுவதற்கான சிறப்பான நாளாக சோமவார பிரதோஷம் கருதப்படுகிறது.