ஆடி கடைசி வெள்ளியில் செய்ய வேண்டிய தானங்கள்: புண்ணியம் பெருக, அம்பாள் அருள் கிடைக்க இதைச் செய்யுங்கள்!

ஆடி மாதத்தின் செவ்வாய், வெள்ளி உள்ளிட்ட விசேஷ நாட்களில் இதுவரை அம்பாளுக்கு சிறப்பு வழிபாடோ, தான தர்மங்களோ செய்ய முடியாமல் போயிருந்தால், ஆடி மாதத்தின் கடைசி வெள்ளிக்கிழமையில் அவற்றைச் செய்வது சிறப்பானதாகக் கருதப்படுகிறது. இந்த நாளில் அம்மனுக்கு படையலிட்டு வழிபடுவதுடன், தான தர்மங்களையும் செய்வது நன்மைகளைப் பெருக்கும் என்பது ஐதீகம்.

அனைத்து வெள்ளிக்கிழமைகளுமே மங்களகரமான நாட்களாகக் கருதப்படுகின்றன. செல்வத்தின் அதிபதியான மகாலட்சுமியையும், மங்களத்தை அருளும் அம்பிகையையும் வழிபடுவதற்கு வெள்ளிக்கிழமை மிகவும் உகந்த நாளாகும். அதிலும் ஆடி மாத வெள்ளிக்கிழமைகள் அம்மனின் அருளைப் பெறுவதற்கு மிகவும் விசேஷமானவையாகப் போற்றப்படுகின்றன. ஆடி மாதத்தின் ஒவ்வொரு வெள்ளியிலும் சிறப்பு வழிபாடுகளை மேற்கொள்வதன் மூலம் குடும்ப நலன், செல்வ வளம் உள்ளிட்ட பல்வேறு நன்மைகள் கிடைக்கும் என்பது நம்பிக்கை. குறிப்பாக கடன் மற்றும் பொருளாதார நெருக்கடிகளில் இருப்பவர்கள் பக்தியுடன் அம்பாளை வழிபட்டு தான தர்மங்களைச் செய்வது சிறப்பாகக் கருதப்படுகிறது.

இந்த ஆண்டு ஆடி மாதத்தின் கடைசி வெள்ளிக்கிழமை ஆகஸ்ட் 14-ம் தேதி வருகிறது. அதே நாளில் ஆண்டாள் நாச்சியாரின் திருஅவதார தினமான ஆடிப்பூரமும் இணைந்து வருவது கூடுதல் சிறப்பாகும். ஆடி கடைசி வெள்ளியும் ஆடிப்பூரமும் இணையும் இந்த நன்னாளில் அம்பாளை வழிபட்டு தானங்கள் செய்வதன் மூலம் குழந்தை பாக்கியம், திருமண யோகம், குடும்ப ஒற்றுமை, செல்வ வளம் உள்ளிட்ட பல்வேறு நலன்கள் கிடைக்கும் என்பது பக்தர்களின் நம்பிக்கை.

கோயிலுக்குச் செல்ல முடியாதவர்கள் செய்ய வேண்டியது

இந்த நாளில் கோயிலுக்குச் சென்று அம்மனுக்கு வளையல் வாங்கிக் கொடுத்து வழிபடலாம். கோயிலுக்குச் செல்ல முடியாதவர்கள் வீட்டிலேயே அம்மன் படத்திற்கு வளையல் மாலை சாற்றி வழிபடலாம். பின்னர் அந்த வளையல்களை அக்கம் பக்கத்தில் உள்ள பெண்கள் அல்லது தேவையுள்ளவர்களுக்கு தானமாக வழங்கலாம்.

ஆடி கடைசி வெள்ளியில் செய்ய வேண்டிய 4 முக்கிய தானங்கள்

1. தாம்பூல தானம்

வெற்றிலை, பாக்கு, மஞ்சள், குங்குமம், வளையல், பூ உள்ளிட்ட பொருட்களைச் சேர்த்து தாம்பூலமாக பெண்களுக்கு வழங்கலாம். இதனால் தீர்க்க சுமங்கலி பாக்கியமும் குடும்ப ஒற்றுமையும் கிடைக்கும் என்பது நம்பிக்கை.

2. ஆடை தானம்

ஏழை மற்றும் தேவையுள்ள பெண்களுக்கு மஞ்சள் அல்லது சிவப்பு நிற புடவை, ரவிக்கைத் துணி உள்ளிட்ட புதிய ஆடைகளை வாங்கி தானமாக வழங்கலாம். பழைய, பயன்படுத்திய ஆடைகளை வழங்காமல் புதிய ஆடைகளை வழங்குவது சிறந்ததாகக் கருதப்படுகிறது. இதனால் குடும்பத்தில் வறுமை நீங்கி, லட்சுமி கடாட்சம் பெருகும் என்பது ஐதீகம்.

3. அன்னதானம்

சர்க்கரைப் பொங்கல், தயிர் சாதம் அல்லது கூழ் போன்றவற்றைத் தயாரித்து அம்மனுக்கு படைத்து, பின்னர் பிறருக்கு அன்னதானமாக வழங்கலாம். அதன்பிறகு அம்மனுக்கு படைத்த பிரசாதத்தை குடும்பத்தினர் ஏற்றுக்கொள்ளலாம்.

4. மஞ்சள் கயிறு தானம்

சுமங்கலி பெண்களுக்கு மஞ்சள் கயிற்றை மஞ்சள், குங்குமம் ஆகியவற்றுடன் சேர்த்து தானமாக வழங்கலாம். இதனால் மாங்கல்ய பலம் பெருகி, குடும்பத்தில் மங்களம் நிலைக்கும் என்பது நம்பிக்கை. திருமணத் தடை உள்ளவர்களும் பக்தியுடன் இந்த தானத்தைச் செய்யலாம்.

தானம் செய்ய ஏற்ற நேரம்

காலை: 9.15 முதல் 10.15 மணி வரை
மாலை: 4.45 முதல் 5.45 மணி வரை

முடிந்தவர்கள் இந்த நான்கு தானங்களையும் செய்யலாம். அனைத்தையும் செய்ய முடியாதவர்கள் தங்களால் இயன்ற ஒரு தானத்தையாவது மனதார வழங்கலாம். தானத்தின் அளவைவிட, அதைச் செய்யும் மனப்பான்மையும் பக்தியும் முக்கியம்.

இந்த நன்னாளில் சுமங்கலி பெண்கள், பெண் குழந்தைகள், கன்னிப் பெண்கள் மற்றும் வயதில் மூத்தவர்களை வீட்டிற்கு அழைத்து உணவு அளிப்பதும், அவர்களுக்குத் தேவையான உதவிகளைச் செய்வதும் சிறப்பானதாகக் கருதப்படுகிறது. வயதில் மூத்தவர்களிடம் ஆசி பெற்றுக்கொள்வதும் நல்லது.

நாம் அளிக்கும் தானத்தை ஏற்றுக்கொண்டு அவர்கள் வழங்கும் ஆசீர்வாதம், அம்பிகையே அவர்களின் வடிவில் வந்து நமது பூஜையை ஏற்றுக்கொண்டு அருள்புரிவதாக பக்தர்கள் நம்புகின்றனர். எனவே, ஆடி கடைசி வெள்ளியும் ஆடிப்பூரமும் இணையும் இந்த விசேஷ நாளில் அம்பாளை மனதார வழிபட்டு, இயன்ற அளவில் தான தர்மங்களைச் செய்து இறையருளைப் பெறுவோம்.