சென்னை: செவ்வாய் மற்றும் வெள்ளிக்கிழமைகளில் வீட்டைத் துடைத்து சுத்தம் செய்யலாமா? பூஜை பாத்திரங்களை துலக்குவது சரியா? என்ற கேள்வி பலரிடமும் இருந்து வருகிறது. குறிப்பாக திங்கள் அல்லது வியாழக்கிழமைகளில் சுத்தம் செய்ய நேரம் கிடைக்காதவர்கள் என்ன செய்ய வேண்டும் என்ற சந்தேகமும் எழுகிறது.
தினமும் மாலை நேரத்தில் விளக்கேற்றி வழிபடுவது சிறப்பானதாகும். குறிப்பாக செவ்வாய் மற்றும் வெள்ளிக்கிழமைகளில் சாம்பிராணி புகை போட்டு இறைவனை வழிபடுவது மகாலட்சுமியின் அருளைப் பெற்றுத் தரும் என்ற நம்பிக்கை நிலவுகிறது. இதற்காக வீட்டு வாசலைப் பெருக்கி, சுற்றுப்புறத்தைச் சுத்தம் செய்து, பூஜை பாத்திரங்களையும் பளபளப்பாகத் துலக்கி பயன்படுத்துவது வழக்கமாக உள்ளது.
இருப்பினும், பூஜை பாத்திரங்களை செவ்வாய் மற்றும் வெள்ளிக்கிழமைகளில் சுத்தம் செய்யலாமா என்ற கேள்வி பலரிடையே உள்ளது. சிலர், அவற்றை திங்கள் அல்லது வியாழக்கிழமைகளிலேயே சுத்தம் செய்து வைத்துக்கொள்ள வேண்டும் என்று கூறுகின்றனர். அதனால், அந்த நாட்களில் நேரம் இல்லாதவர்கள் செவ்வாய் அல்லது வெள்ளிக்கிழமைகளில் இந்தப் பணிகளைச் செய்யலாமா என்ற சந்தேகம் இயல்பாகவே எழுகிறது.
ஆன்மிக நம்பிக்கையின்படி, செவ்வாய் மற்றும் வெள்ளிக்கிழமைகள் மகாலட்சுமிக்கு உகந்த நாட்களாகக் கருதப்படுகின்றன. எனவே, அந்த நாட்களில் வீடு முழுவதையும் துடைத்து சுத்தம் செய்வதை சிலர் தவிர்க்க வேண்டும் என்று கூறுகின்றனர். இதனால் லட்சுமி கடாட்சம் குறையும் என்பது அவர்களின் நம்பிக்கை. அதற்குப் பதிலாக, புதன்கிழமை அல்லது வியாழக்கிழமை மாலைக்குள் பூஜை அறை மற்றும் பூஜை பாத்திரங்களைச் சுத்தம் செய்து வைத்துக்கொள்வது சிறந்ததாகக் கருதப்படுகிறது.
மேலும், வெள்ளிக்கிழமை அதிகாலையில் சுத்தம் செய்வதை விட, நேரடியாக விளக்கேற்றி வழிபடுவது மங்களகரமானதாக நம்பப்படுகிறது. எனவே, வீட்டைத் துடைப்பது, தூசி தட்டுவது, சாம்பிராணி போடுவதற்கான முன்னேற்பாடுகள் போன்றவற்றை வியாழக்கிழமையிலேயே முடித்துக்கொண்டு, செவ்வாய் மற்றும் வெள்ளிக்கிழமைகளில் அமைதியாக வழிபாட்டில் ஈடுபடுவது நல்லது என்று பாரம்பரியமாக கூறப்படுகிறது.
குறிப்பு: மேற்கண்டவை பாரம்பரிய ஆன்மிக நம்பிக்கைகள் மற்றும் வழக்கங்களின் அடிப்படையில் கூறப்படுபவையாகும். இதுகுறித்து ஒவ்வொரு குடும்பத்திலும் பின்பற்றப்படும் மரபுகள் மாறுபடலாம்.